| श्री स्वामी समर्थ अष्टक ||

असें पातकी दीन मीं स्वामी राया |

पदी पातलो सिद्ध व्हा उद्धराया ||

नसे अन्य त्राता जगी या दीनाला |

समर्थां तुझ्यावीण प्रार्थू कुणाला || १ ||

मला माय न बाप न आप्त बंधू |

सखा सोयरा सर्व तू दीन बंधू ||

तुझा मात्र आधार या लेकराला |

समर्था तुझ्यावीण प्रार्थू कुणाला || २ ||

नसे शास्त्र विद्या कलादीक काही |

नसे ज्ञान, वैराग्य ते सर्वथा ही ||

तुझे लेकरु ही अहंता मनाला |

समर्था तुझ्यावीण प्रार्थू कुणाला || ३ ||

प्रपंची पुरा बद्ध झालो दयाळा |

तुझा दास मी ही स्मृती ना मनाला ||

क्षमेची असे याचना त्वत्पदाला |

समर्था तुझ्यावीण प्रार्थू कुणाला || ४ ||

मला काम क्रोधाधिकी जागविले |

म्हणोनी समर्था तुला जागविले ||

नका दूर लोटू तुझ्या सेवकाला |

समर्था तुझ्यावीण प्रार्थू कुणाला || ५ ||

नको अंत पाहू त्वरे धाव घेई |

तुझ्यावीण नाही दुजी श्रेष्ठ आई ||

अनाथासि आधार तुझा दयाळा |

समर्था तुझ्यावीण प्रार्थू कुणाला || ६ ||

कधी गोड वाणी न येई मुखाला |

कधी द्रव्य ना अर्पिले याचकाला ||

कधी मुर्ती तुझी न ये लोचनाला |

समर्था तुझ्यावीण प्रार्थू कुणाला || ७ ||

मला एवढी घाल भीक्षा समर्था |

मुखे नित्य गावी तुझी गुण गाथा ||

घडो पाद सेवा तुझ्या किंकराला |

समर्था तुझ्यावीण प्रार्थू कुणाला || ८ ||

|| श्री स्वामी समर्थार्पणमस्तु ||